Selektori i Argjentinës, Diego Armando Maradona, po mundohet t’i motivojë me të gjitha mënyrat e mundshme lojtarët e tij, vetëm për të arritur deri tek suksesi historik – triumfi në Botërorin 2010. Derisa pohon se tashmë e ka qartë se cilët futbollistë do të futen në fushë me 12 qershor kundër Nigerisë, legjenda e futbollit botëror ka bërë një pretim kontrovers, nëse ekipi e tij e ngrit lart trofeun e çmueshëm, në Afrikën e Jugut.
“Nëse e fitojmë Botërorin, do ta bëj një xhiro rreth stadiumit komplet nudo”, ka premtuar ai. Maradona beson mjaft në ekipin e tij, për të cilin thotë se ka kapacitet të ngadhënjejë, në finalen e 11 korrikut, kur edhe mbyllet evenimenti më i madh botëror i futbollit.
Ndërkohë, ai e konsideron si mjaft të rëndësishëm intonimin e himnit, përpara çdo ndeshjeje. Sipas Maradonës, himni nuk është vetëm për t’u kënduar, por edhe për t’u përjetuar, ngase është një gjë e veçantë, që ia kujton futbollistit shumë gjëra: të luftojë për fanellën e tij, për familjen që e shikon dhe për të gjithë vendin që e përfaqëson.